DEL A: INTRODUKSJON TIL TEMAET OG TEKSTANE
A-1: Introduserande spørsmål
- Kva er emojis?
- Bruker de sjølve emojis? Gi i så fall nokre døme.
- Kva tid bruker de emojis (om de bruker det)?
- Kva tenkjer de er grunnen til at folk bruker emojis?
- Er det viktig å vite kva emojis tyder?
A-2: Ordbøying
Korleis bøyer ein ordet emoji på norsk? Skriv ned bøyinga av ordet på både bokmål og nynorsk ut frå korleis de trur ein bøyer ordet.
Sjekk etterpå med Bokmåls- og Nynorskordboka.
A-3: Praktisk aktivitet i klasserommet
Grupper: Arbeid i grupper med det vedlagde emoji-skjemaet og kom fram til forklåringar på kva emojiane tyder. Skriv dette inn i dykkar eige skjema.
Klassen: Samanlikn i klassen kva gruppene har kome fram til. Har gruppene kome fram til det same, eller er det skilnader i svara?
A-4: Klasseromsdiskusjon
Er emojiar ord? Prøv å finne argument både for og mot dette.
DEL B: LESING AV SPRÅKPRAT-INNLEGG OG OPPGÅVER TIL TEKSTEN
Les Språkprat-innlegget «Ordklasser og gamle damer» (2017) av Ingvil Brügger Budal.
B-1: Spørsmål til teksten
Svar på desse oppgåvene med hjelp av Språkprat-innlegget og andre supplerande kjelder:
- Kva meiner ein med emojiar?
- Kva meiner ein med forkortingar?
- Kva meiner ein med språkleg økonomisering, og kva er koplinga til omgrepa ovanfor?
- Kva kjenneteiknar ordklassen interjeksjonar?
- Kva slags argument brukar Ingvil Brügger Budal for at emojiar og forkortingar er interjeksjonar? Kva taler imot?
B-2: Forklar uttrykka:
- morfologi
- ordklasse
- interjeksjonar
- verb
- alfabetisk skriftsystem
- akronym
- ideogram
- modus
- latinsk skrift
- symbolspråk
DEL C: FORDJUPING OG UTFORSKING AV TEMAET
C-1: Lesing av supplerande tekst
Les teksten: «– Emojis er språkets kjønnssykdom», som vart publisert på NRK Kultur og underholdning 11.02.17, og svar på desse oppgåvene:
- Kva er emotikons, og kva er koplinga til emojis?
- Guri Idsø Viken, som er omtalt i teksten, kallar emojis for «språkets kjønnssjukdom»? Kva meiner ho med dette uttrykket, og kva slags verkemiddel bruker ho her?
- I teksten kjem det fram argument for å bruke emojis. Kva går argumentet/argumenta ut på? Har de nokre fleire argument for å bruke emojis?
- I teksten kjem det også fram argument mot å bruke emojis. Kva går argumentet/argumenta ut på? Har de nokre fleire argument mot å bruke emojis?
- Kva er ditt/dykkar syn på emojis: Vil de seie at det er mest positivt eller negativt å bruke emojis?
C-2: Intervju
Individuelt: Intervju ein eller fleire midaldra familiemedlemmer (foreldre, tante, onkel osv.) eller andre de kjenner på 35–50 år + ein eller fleire eldre familiemedlemmer eller andre de kjenner på 60+ år om kva emojiane i emoji-skjemaet tyder. Skriv ned svara deira i skjemaet og samanlikn med dine eigne svar i ei tidlegare oppgåve.
Grupper: Gå gjennom svara dykkar i grupper. Har dei midaldra og dei eldre personane same tyding av emojiane som dykk sjølve, eller finn de nokre skilnader? Og er skilnadene kopla til alderen til personane?
Klassen: Diskuter i klassen dette: Har dei midaldra og dei eldre personane same tyding av emojiane som dykk sjølve, eller finn de nokre skilnader? Og er skilnadene kopla til alderen til personane?
C-3: Lag nye emojiar!
Arbeid individuelt, i par eller i grupper. Lag eit forslag til tre nye emojiar, og bestem kva emojiane tyder. Teikn opp emojane fysisk eller digitalt, og heng dei opp på veggen i klasserommet. La dei andre i klassen gjette på kva dei trur dei ulike emojiane tyder. Etterpå skal kvar gruppe oppgi svaret og argumentere for tydinga si.
sprakprat.no 